Ja, richtig gläse. D Wöschwiiber händ en Abstächer is Moulin Rouge gmacht! Das mit em Can-Can Tanz müend mer sicher nochli üebe. Aber defür hämmer au das Johr wieder "See La Wyy" dekoriert. Da gfind me sich inere ganz andere Wält wieder. Zwüsched Straussefedere, Can-Can, Cabaret und und und, chönd ihr jetzt alli ächli Pariser Moulin Rouge schnuppere. 

Übrigens, au das Jahr hämmer wieder es paar Bilder gstaltet. Nüme grad soviel wie letschts Johr, aber doch au es paar. Und die tüned mer denn wieder am Chliine Ziischtig versteigere. Es git dänn auch ganz feins Raclete vo üs Wöschwiiber serviert. Es lohnt sich also, wenn am Chliine Ziischtig am 17.00 im See La Wyy verbii luegsch. Und wer weiss, villicht ghörsch du zu de Ersteigerer vo somene wunderprächtige Bild? Das würd üseri Deko-Kasse wieder chli ufmoze ;-)

Üs Wöschwiiber gseht me denn au a de beide Umzüg vo de Narrhalla am 13.1. (Nachtumzug) und am 14.1.24. Nöd ganz im Wöschwiiber Kostüm, mir händ üs es bitz am Motto aapasst. Lönd Eu überrasche. Und wills e churzi Fasnacht isch, goht's Schlag uf Schlag wiiter. E Wuche spöter - am 28.1.24 simmer am Bezirksumzug in Bäch, En Tag spöter isch de erschti Fasnachtstag, wo mir wieder zäme mit de Narrhalla d Chinderfasnacht uf de Gass organisiered. 

Am schmutzige Donnschtig goht denn s einte oder andere Wöschwiib nochli go butzne - sicher mached mer es Bsüechli im Altersheim und i de Alterswohnige.

Was ihr au nöd sötted verpasse - am Sunntig, 11. Februar isch de Chinderfasnachts-Sunntig i de Seefeldturnhalle z Lachä. Au do simmer natüürli debii. En Tag spöter - am Güdelmäntig - schmiked mir denn wieder Chlii, Jung, Älter und Alt, damit alli die letschte Fasnachtstäg im richtige Look chönd aago. Mir sind dänn wieder mit Schmink- und Kafizält uf de Märtstrouss aazträffe. 

Am Obig gsehnd er üs denn grad nomol, mir unterstützed d Hore-Butzi bi ihrerer Schnitzelbanktour dur d Restaurants. Mir händ defür extra öppis vorbereitet, wo au ihr dörfed (oder söttet) mittmache. Chönd scho mol gspannt sii. 

Und dänn isch de au scho chliine Ziischtig und de letschti Fasnachtstag. Üs gsehnd er am Iizug vo de Fasnachtsgsellschafte und dänn natürli: TÖTERÖTÖTÖÖÖÖÖ:  Bilderverschteigerig mit feinem Raclette im See La Wyy! Chömmed verbii, mir freued üs!

Ja genau! Richtig gläse! Hüt Obig am Chliine Ziischtig wird de Hammer gschwunge! Und zwar wärded üseri Deko-Bilder im See La Wyy versteigeret. Und du chas natüürli debii sii und mitsteigere :-)

Wär's nöd so mit Kunst hät, aber unbedingt eine vo dene Chöpf wo gsuecht wärded, möchti mitheinäh und zum Biispiel im Wohnzimmer ufhänke (ja, das chunt sicher guet), auf für die oder dä isch hüt Oubig, de richtig Momänt is See La Wyy zcho. Alli üseri Wanted-Bilder wärded nämli ebeso versteigered. 

Das ganze goht natürli nöd ohne profundi Leitig. Dur de Aalass füehrt de Polizist Guido und lueged, dass au aaständigi Aagebot uf de Tisch chömmed. Übrigens, es isch üs zuetreit worde, dass es bereits anonymi Büüter gäbi. Jawohl. Richtig gläse. 

Also, nöd verpasse, am beste chunsch hüt Obig am 6i is See La Wyy und machsch a dem Versteigerigs-Spektakel grad mit. Mit dem Chole chömmer dänn nämli scho die nöchschti Deko a de nöchschte Fasnacht plane...

ENDLICH!!! Es isch mol wieder RICHTIGI Fasnacht! Weisch so mit richtige Umzüg, mit butzne i de Beize mir chönd Rosouli, Schnapps, Zältli, Brügeli und und und verteile und fäschte das Decki gwagglet. Ei ei ei, ob mir no wüssed, wie das goht? Mir wärded's usegfinde!

Zum Biispiel im See La Wyy... die Wyybar hämmer churzerhand umgwandlet in Hermann's Mafiazentrale. Chömmed cho luege! Aber ufpasse! De Hermann isch de Boss und es tummlet sich ganz vieli gsuechti Gstalte i dem Etablissement!

Also, mir freued üs, mit eu d Fasnacht 2023 chönne zgnüsse. Bis bald!

Tja, wer hettis au dänkt... aber au Wiiber chönd älter werde. Klar, dass mir das fiire möchted. Und zwar mit möglichscht villne Lüüt. Jung und alt. 

​Am 23. Juni isches sowit! Am 13.30 startet mir mitere Schnitzeljagd em "Wash-Trail" durch's Dorf. Do derzue freued mir üs natüürli, wänn sich möglichscht viili Teams aamäldet. De Start isch bim Raffplatz - s Ziel natürlich au. Soviel chömer verrate. Und klar het's au en Feschwirtschaft. Jetzt wartet mir nur no uf ücheri Aamäldige... 

​Am Obig am sächsi hämmer dänn no üseri "Wash-Party". Ja genau! Es Wöschwiiber Showprogramm, Unterhaltig mit em DJ Andy Voice und hoffentlich au no es paar Produktione vo üsne befründete Fasnachtsvereine. Chömmed doch au! De IItrit isch gratis. 
​
​Alli Infos zu üsem Jubiläum gfindsch Du übrigens uf üsere Jubi-Siite det chasch Dich dänn au grad aamälde. 
Woeschwiiber-Jubi
​Also - mir freued üs, mich Üch am Samstig, 23. Juni ächli chönne zfiire...

​Bis bald
​Lachner Wöschwiiber
​

Händer s'Gwändli scho parat? Am Sunntig isch wieder de farbeprächtigi Familie- & Kinderkostümball im Bäre z Lache aagseit.

Natüüürli mit ganz villne Attraktione. Tolli Musig, Bäretanz mit de Bäre, Röllis und Zigerchrütler chömmed au no zBsuech und en lässigi Show gits sowieso no obedruf. 

Klar, werded die schönschte und beschte Köstüm i drüü Kategorie prämiert. Es winked wieder super Priise!

​Unbedingt verbii cho. Mir freued üs uf Eu.

Ja, richtig gläse. S 10. Mol mached mir das Johr mit. 10ni simmer aber nonig ganz. Mir händ nur schampar früeh aagfange. Üsers 10jöhrige fiired mir dänn im Juni 2018. Dänn vor 10 Johr het nämlich die ersti Sitzig mit de Idee vo de Lachner Wöschwiiber stattgfunde. Aber will mir das Johr zum 10. Mol mitmached, hämmer üs es chliises Gschänkli gmacht: Mir händ es neuis Gsicht. Das heisst en neui Maske. Jawohl - us Holz. Und sogar sälber gschnitzt.

Zrug aber zur Fasnacht 2018. Au das Mol simmer wieder ziemlich unterwägs. Trotz de churze Fasnacht. Und vill isch los... Chinderfasnachtsumzug, Chinderfasnacht, Kostümball, Schminkzält und und und... mir freued üs natürlich, wänn mer ganz viili Zueschauer, Mitmacher, Butzis und Schminkgsichter dörfed begrüesse. 

Übrigens - me dörf bi üs au gärn inneluege und cho schnuppere. Wänn Du Lust häsch, mit üs mol an en Umzug z cho. Mäld Dich bi üs. Mir freued üs. 

So. Und do no üseri Date: