Bienvenue au Moulin Rouge

Ja, richtig gläse. D Wöschwiiber händ en Abstächer is Moulin Rouge gmacht! Das mit em Can-Can Tanz müend mer sicher nochli üebe. Aber defür hämmer au das Johr wieder "See La Wyy" dekoriert. Da gfind me sich inere ganz andere Wält wieder. Zwüsched Straussefedere, Can-Can, Cabaret und und und, chönd ihr jetzt alli ächli Pariser Moulin Rouge schnuppere. 

Übrigens, au das Jahr hämmer wieder es paar Bilder gstaltet. Nüme grad soviel wie letschts Johr, aber doch au es paar. Und die tüned mer denn wieder am Chliine Ziischtig versteigere. Es git dänn auch ganz feins Raclete vo üs Wöschwiiber serviert. Es lohnt sich also, wenn am Chliine Ziischtig am 17.00 im See La Wyy verbii luegsch. Und wer weiss, villicht ghörsch du zu de Ersteigerer vo somene wunderprächtige Bild? Das würd üseri Deko-Kasse wieder chli ufmoze ;-)

Üs Wöschwiiber gseht me denn au a de beide Umzüg vo de Narrhalla am 13.1. (Nachtumzug) und am 14.1.24. Nöd ganz im Wöschwiiber Kostüm, mir händ üs es bitz am Motto aapasst. Lönd Eu überrasche. Und wills e churzi Fasnacht isch, goht's Schlag uf Schlag wiiter. E Wuche spöter - am 28.1.24 simmer am Bezirksumzug in Bäch, En Tag spöter isch de erschti Fasnachtstag, wo mir wieder zäme mit de Narrhalla d Chinderfasnacht uf de Gass organisiered. 

Am schmutzige Donnschtig goht denn s einte oder andere Wöschwiib nochli go butzne - sicher mached mer es Bsüechli im Altersheim und i de Alterswohnige.

Was ihr au nöd sötted verpasse - am Sunntig, 11. Februar isch de Chinderfasnachts-Sunntig i de Seefeldturnhalle z Lachä. Au do simmer natüürli debii. En Tag spöter - am Güdelmäntig - schmiked mir denn wieder Chlii, Jung, Älter und Alt, damit alli die letschte Fasnachtstäg im richtige Look chönd aago. Mir sind dänn wieder mit Schmink- und Kafizält uf de Märtstrouss aazträffe. 

Am Obig gsehnd er üs denn grad nomol, mir unterstützed d Hore-Butzi bi ihrerer Schnitzelbanktour dur d Restaurants. Mir händ defür extra öppis vorbereitet, wo au ihr dörfed (oder söttet) mittmache. Chönd scho mol gspannt sii. 

Und dänn isch de au scho chliine Ziischtig und de letschti Fasnachtstag. Üs gsehnd er am Iizug vo de Fasnachtsgsellschafte und dänn natürli: TÖTERÖTÖTÖÖÖÖÖ:  Bilderverschteigerig mit feinem Raclette im See La Wyy! Chömmed verbii, mir freued üs!