Ab ad Fasnacht

Und scho isch si wieder do... die 5. Johresziit!

Das Johr gseht me üs rächt hüfig a Umzüg... es git en Abstächer nach Wange an Nachtumzug vo de Röllizunft und au i de Höfe simmer aazträffe und das grad zweimol: sowohl am Bezirksumzug in Feusisberg wie au am Jubi-Umzug vo de Exel-Häxe. D Chörb sind packt - d Wöschmaschine au - sött also klappe!

A de Chinderfasnacht z Lachä chan me üs denn au wieder aaträffe. Für d Kids hämmer das Mol es Programm rund um's Motto Zirkus zämegstellt. Also wär als Elefant will cho - nur zue. Mir nämed natüürlich au Zauberer, Jongleure, Leue, Tiger, Dompteure, Rössli, Clowns, Akrobate und Akrobatinne und wänn sich öpper ganz chlii chan mache - wie wärs mit Flohzirkus?

Und wänn me scho am Gwändli bastle isch... au das Johr gits wieder en Kostümball für Chind und Familie im Hotel Bäre. Me chönti ja grad als ganzi Zirkusfamilie ufchrüze.

Am Fasnachtsmäntig schminked mer dänn au wieder. Damit mir aber nöd wieder a üsi zarte Finger früüret und nöd verzittered schminked, mached mer das direkt im Jugendbüro. Vorusse stoht dänn aber au no üses Kafizält, für die wo sich mit Kafi, Tee, Punsch etc wänd ufwärme.

Ihr gsehnd - es isch ächli öppis los. Drum mach ich jetzt Schluss und übergibe as Fasnachttriibe!